CHADEMA Bunda yajipanga kuing’oa CCM

CHAMA cha Demokrasia na Maendeleo (CHADEMA) Wilaya ya Bunda, Mara kimewataka wanachama wake kuunganisha nguvu na ushirikiano ili kuking’oa Chama Cha Mapinduzi (CCM) mwaka 2015.

Wito huo ulitolewa jana na Kaimu Katibu wa CHADEMA wilayani hapa, Samuel Alfred, alipozungumza na Tanzania Daima Jumapili lililofika ofisini kwake kutaka kujua harakati za ujenzi wa chama hicho kikuu cha upinzani nchini.

Alisema kimejipanga vizuri kuongoza serikali katika Uchaguzi Mkuu wa mwaka 2015, hivyo ni vema kila Mwana CHADEMA ahakikishe anashiriki kukijenga.

“Harakati za CHADEMA ni kuhakikisha uchaguzi wa serikali za mitaa mwakani tunashinda na kuing’oa CCM katika Uchaguzi Mkuu ujao wa mwaka 2015.

“Tunahitaji wananchi waendelee kutuunga mkono na wanachama wetu wajitolee kwa nguvu zao kukijenga chama, maana tunajiandaa kuongoza serikali,” alisema Alfred ambaye pia ni Katibu wa chama hicho Bunda.

Awali alieleza kufurahishwa kwake na harakati za kukijenga chama hicho, zilizoanzishwa tangu mwaka jana na kada wa chama hicho, Pius Masuruli.

“Tangu mwaka jana hadi leo hii Pius amekuwa mstari wa mbele kushiriki kuijenga CHADEMA, harakati hizi zinapaswa kuigwa na wanachama wengine,” alisema.