CHADEMA yamtaka Waziri Makala awajibike

MWENYEKITI wa Chama cha Demokrasia na Maendeleo (CHADEMA) kata ya Sungaji, wilaya ya Mvomero, mkoani Morogoro, amemtaka Naibu Waziri wa Habari, Vijana, Utamaduni na Michezo, Amos Makala, kujiuzulu kwa kushindwa kudhibiti wafugaji.

Mwenyekiti wa CHADEMA kata hiyo, Musa Kombo, amesema Makala pamoja na baadhi ya viongozi wa mkoa na wilaya  wameshindwa kuwachukulia hatua wavamizi (wafugaji) ambao wameharibu kiasi kikubwa cha mashamba na kusababisha njaa.

Kombo alitoa kauli hiyo mara baada ya kumalizika kwa mkutano uliofanyika katika kijiji cha Kigugu Julai 11.7 na kuhutubiwa na Naibu Waziri huyo.

Makala katika hali iliyowashangaza wengi, alijibu kiwepesi sana  maswali yaliyoulizwa na  wananchi.

Katika majibu yake kuhusiana na uvamizi wa wafugaji, Makalla alisema yeye ni kama mwananchi mwingine wa kawaida na kwamba suala la wafugaji ni gumu hata Waziri Mkuu, Mizengo Pinda, ameshindwa kutoa Suluhu.

Kiongozi huyo wa CHADEMA alisema kuwa majibu kama hayo, yamewakatisha mno tamaa wakulima wanaoitegemea serikali kuwasaidia.

“Wakulima wanapopewa majibu mepesi kwa maswali magumu, wanahisi hawana viongozi wa serikali wanaomsaidia Rais, na kudhani hana watu wa kumsaidia kujibu hoja za msingi,” alisema.

Mbali ya swali la mgogoro wa wakulima na wafugaji, maswali mengine ambayo Makala alishindwa kutoa majibu ni kuhusu fedha za Mfuko wa Jimbo, wakati lile la ahadi yake ya ujenzi wa zahanati alisema anangoja kwanza aone juhudi za wananchi ndipo atawasaidia na pia kufuatia mradi wa maji (PADEP) ambao unasuasua hakutoa jibu la kuridhisha zaidi ya kuwakatisha tamaa wananchi.

Majibu hayo pia yalimsononesha Katibu wa Chama cha Mapinduzi Kata ya Sungaji Shukuru Mikenegeze aliyesema, “Kama ulivyomsikia mbunge, wafugaji wana nguvu ya fedha, hivyo itabidi na sisi tuanzishe vikundi vya kijamii kulinda mazao yetu yasiharibiwe na mifugo, jambo ambalo watu wanadai itaibuka vita.