Marando: Mchagueni Saulo mpate maendeleo

MAKAMU Mwenyekiti wa Chama cha Demokrasia na Maendeleo (CHADEMA), Kanda ya Pwani, Mabere Marando, amewaomba wakazi wa kata ya Mianzini kumchagua Ngwata Saulo kuwa diwani wao, ili akasimamie fedha zinazotengwa kwa ajili ya miradi ya maendeleo.

Marando alitoa kauli hiyo juzi kwenye mkutano wa kampeni za uchaguzi mdogo wa diwani uliofanyika kwenye viwanja vya Shule ya Msingi Mbagala Rangi Tatu, Dar es Salaam.

Alisema watakapomchagua Saulo watakuwa hawajafanya makosa kwa kuwa CHADEMA ina uhakika kuwa ana uwezo wa kuchambua bajeti.

“Hata waasisi wetu wa siasa za nchi hii, enzi hizo wakiendesha siasa walikuwa na lengo la kumng’oa mkoloni Mwiingereza; hawakuwa wakipumzika kufanya siasa,” alisema Marando.

Alisema CHADEMA ni chama makini cha upinzani chenye malengo ya kushika dola kwa kuking’oa chama tawala madarakani, ndio maana hakipumziki kufanya kazi kwa ajili ya kuwakomboa wanyonge kama Wanamianzini.

Mgombea udiwani huyo, Saulo, alisema atakapochaguliwa atahakikisha wenyeviti wa serikali za mitaa wote wa kata hiyo, wanafutwa kazi kutokana na wenyeviti hao kushiriki vitendo mbalimbali vya kuwahujumu Wanamianzini.