Mbowe aleta ushauri

Katika hatua nyingine, Kiongozi wa Kambi ya upinzani Bungeni, Freeman Mbowe, amekuja na mikakati ya kutatua kero ya msongamano wa magari katika Jiji la Dar es Salaam.

Akichangia mjadala wa hotuba ya bajeti ya Wizara ya Ujenzi, Mbowe alishauri Serikali namna ya kupunguza foleni wakati ikiandaa mipango ya kudumu katika kutatua tatizo hilo.

Alisema tatizo la foleni Dar linatokana kitovu cha biashara kuwa katikati ya jiji kwamba serikali ingepaswa kutengeneza miundombinu ya katikati ya mji ili kufanya magari yanayoingia katika maeneo hayo kutembea na kufika bila kusababisha msongamano mkubwa.Ili kupunguza wingi wa magari kuingia katikati ya jiji, mbunge huyo wa Hai, alishauri kuwepo udhibiti wa magari yanayoingia katika maeneo hayo tofauti na ilivyo sasa ambapo kunakuwa na magari yanaingia kirahisi siku hadi siku na kufanya msongamano mkubwa.Akilinganisha suala hili na jiji la London aliitaka Wizara ya Ujenzi kuanzisha ada ya kuruhusu magari kuingia katikati ya jiji.

Mbowe alisema ada hiyo si tu kwamba itaondoa foleni bali pia jiji litaweza kukusanya mapato ambayo yatasaidia katika kupanua na kukarabati miundombinu na huduma mbalimbali kwa wakazi wake.

Mbowe alisema kutokana na mashimo yaliyoko katika baadhi ya barabara jijini humo, magari mengine hulazimika kutembea kwa mwendo mdogo hivyo kusababisha magari hayo kujazana na kusababisha msongamano mkubwa.

Pia alizungumzia kuhusu maegesho ya magari ambapo alishauri kurekebisha sehemu hasa katikati ya jiji kwani mara nyingi vyombo hivyo vimekuwa vikiegeshwa katika barabara za watembea kwa miguu na kufanya kupita katikati ya barabara na kuhatarisha usalama wao.

“Kama watembeao kwa miguu wakiachwa wapite sehemu yao, magari yakipaki panapostahili tutafanya mtiririko mzuri wa magari, hivyo tutapunguza msongamano wa magari na tatizo hili la watembao kwa miguu wakipita barabarani ajali zitazidi kutokea,” alisema.

Mbowe alishauri kuwe na vivukio vya watembea kwa miguu ambavyo vitakuwa vya juu au chini kwani daraja la Manzese pekee halitoshi.

Mbunge wa Kigoma Mjini, Peter Serukamba (CCM) alisema fedha imekuwa tatizo katika ujenzi wa barabara hivyo alishauri Serikali kukopa ili kuweza kujenga barabara na si tu kutegemea bajeti inayopangwa kwani hivyo hatupaswi kuogopa kukopa katika masuala ya maeneleo.

Pia Serukamba alizungumzia suala la kuchakaa kwa barabara ambapo alibainisha kuwa tatizo kubwa ni kuelemewa kwa miundombinu hiyo kwa kuwa magari mengi yanapita na kusababisha uharibifu mkubwa.

Alisema Serikali inapaswa kufufua miundombinu ya reli ili barabara zisielemewe kwa magari kupita kwa wingi kwani mara nyingi magari makubwa hutumia barabara kusafirisha mizigo mikubwa na mizito na kupita katika barabara zetu.

Kwa upande wake mbunge wa kuteuliwa na Rais James Mbatia (NCCR-Mageuzi) alisisitiza juu ya kuwepo kwa usafiri wa majini katika Pwani ya Bahari ya Hindi hasa katika maeneo ya Bagamoyo hadi katikati ya Jiji la Dar es Salaam ili kupunguza msongamano wa magari.

Mbatia alisema suala la msongamano limekuwa ni janga hivyo lazima wizara za Ulinzi, Mambo ya Ndani, Utawala Bora zikae pamoja na kuzungumzia suala hilo kwani janga halisubiri kesho bali lazima tulifanyie kazi leo.

Tanzania Daima