Pinda apinga madaraka ya rais

 ATAKA MAWAZIRI WASITOKANE NA WABUNGE

WAZIRI Mkuu, Mizengo Pinda, ametaka madaraka ya rais yadhibitiwe ili kumwezesha kufamya kazi kwa ufanisi zaidi.

Alisema si lazima kila kitu aamue rais wakati ana wasaidizi wake ambao wanaweza kurahisisha utendaji wake.

“Sote tunajua rais ana majukumu mengi lakini si lazima yote ayafanye yeye, anaweza hata kusaidiwa na Makamu wa Rais kwenye vitu kama uteuzi na kushughulikia mambo ya kinidhamu,” alisema.

Akizungumza na waaandashi wa habari jijini Dar es Salaam jana baada ya kuwasilisha maoni ya mabadiliko ya Katiba, Pinda pia alipendekeza mawaziri wasitokane na wabunge ili kuwawezesha kutekeleza vizuri majukumu yao.

Kwa mujibu wa Pinda, mawaziri wengi wamekuwa wakibanwa na shughuli za kiserikali na kushindwa kutekeleza shughuli za Bunge ambazo ndizo zimewafanya wafike bungeni na kuteuliwa kuwa mawaziri.

Katika suala la Muungano, Pinda alipendekeza kuwe na serikali mbili kama ilivyo sasa lakini kuwe na tume maaalumu itakayoshughulikia matatizo ya Muungano.

“Najua serikali mbili zina kero nyingi lakini dawa si kuziondoa ila tuunde tume ya kushughulikia kero hizo, nadhani kila kitu kitakwenda sawa, sioni sababu ya watu kung’ang’ania kutengana kwa sababu ya mafuta au gesi, kama mafuta yapo Zanzibar itarahisisha badala ya kununua Uarabuni tuyapate karibu,” alisema.

Waziri mkuu huyo pia alipendekeza kazi za mihimili mitatu (Bunge, Mahakama na Serikali), ziainishwe katika katiba mpya ili kuzuia muingiliano wa kazi, kwani mihimili hiyo imekuwa ikitegemeana katika kutimiza kazi zake.

Waziri mkuu huyo pia alipendekeza katiba mpya iwe na kipengele kinachoruhusu Serikali za Mitaa kuwa huru kufanya kazi zao na ioneshe wazi majukumu pamoja na mgawanyo kati ya Serikali Kuu na Serikali za Mitaa.

Alisema kwa muda mrefu sasa, Seriakli za Mitaa zimekuwa zikitegemea kila kitu kutoka Serikali Kuu lakini haoni sababu ya kupewa jina la serikali wakati haziko huru.

Hata hivyo Pinda aliupongeza mfumo mzima wa mchakato wa kukusanya maoni ya katiba mpya kwa kuwa umeandaliwa na kusimamiwa na Watanzania.

Awali, Mwanasheria Mkuu mstaafu, Jaji Damian Lubuva, alifikisha maoni yake katika tume hiyo na kupendekeza katiba ijayo iwe na kipengele kinachoruhusu kuwa na jopo maalumu la kupendekeza majina ya majaji na rais apewe majina hayo kwa ajili ya uteuzi, badala ya uteuzi huo kufanywa na kuthibitishwa na rais mwenyewe.

Lubuva alipendekeza muda wa majaji kustaafu uongezwe hadi kufikia miaka 70 kwa majaji wa Mahakama Kuu na miaka 72 kwa majaji wa Mahakama ya Rufaa.

Mwanasheria huyo alipendekeza katiba mpya ianzishe mahakama ambayo itaitwa ‘Supreme Court’, itakayowezesha wananchi kutoa malalamiko yao iwapo hawataridhika na uamuzi wa Mahakama ya Rufaa.

Aliongezea kuwa katiba iainishe Ofisi ya Mwanasheria Mkuu kabla ya kutaja majukumu ya Mwanasheria Mkuu pamoja na kufanya marekebisho ya kuainisha Ofisi ya Mkurugenzi wa Mashitaka (DPP) kabla ya kushughulikia uteuzi wa shughuli zake ili kuimarisha uhuru katika utendaji kazi wake.

“Itamkwe bayana katika utendaji kazi kuwa DPP anaweza kuondoshwa madarakani tu kwa sababu zitakazoainishwa kama vile kutomudu kufanya kazi kwa sababu ya ugonjwa au kushindwa kufanya hivyo,” alisema.