Mbunge wa CHADEMA kortini

MBUNGE wa Ukerewe, Salvatory  Machemli (CHADEMA)  amefikishwa  mahakamani  akikabiliwa na mashitaka ya uchochezi.

Machemli  (39)  amesomewa  mashitaka  hayo  jana  mbele ya  hakimu  mkazi  mfawidhi  wa mahakama ya wilaya, Rouben  Luhasha akidaiwa kutenda kosa hilo mwaka mmoja na nusu uliopita.

Mwendesha mashitaka wa polisi,  ASP Denis Rwiza alidai mahakamani hapo kuwa mshitakiwa huyo alitenda kosa hilo Oktoba 23, 2011 katika Kijiji cha Nyamanga  kisiwani Ukara wakati akiutubia  mkutano wa hadhara ulioandaliwa na CHADEMA.

Alisema mshitakiwa huyo kwa  makusudi aliwachochea wananchi kutenda kosa la shambulio kwa kuwaelekeza wachukue uamuzi mgumu wa kuwazuia, hata  kushambulia maofisa wa polisi  wakiwa katika kazi zao kisiwani hapo.

Katika maelezo ya kosa, inadaiwa   kupitia mkutano huo wa hadhara, aliwataka wananchi wazuie, wamshambulie kwa silaha za jadi ikiwemo marungu, mapanga na fimbo ofisa wa polisi  atakayekwenda kutafuta  washitakiwa nyakati za usiku.

Katika maelezo yake zaidi,  mwendesha mashitaka huyo wa polisi alisema kipindi hicho  ulikuwepo msako wa watuhumiwa wa mauaji ya watu wanne waliouawa na wananchi Desemba 10, 2010 mbele ya maofisa wa polisi kwa tuhuma za ujambazi.

Mshitakiwa huyo alipewa dhamana. Upelelezi wa kesi hiyo umekamilika, na imeahirishwa hadi Machi 21, mwaka huu itakapotajwa na kusikiliza maelezo ya awali.