BARAZA LA VIJANA WA CHADEMA (BAVICHA) SERIKALI YA CCM HAINA UWEZO WA KUTATUA TATIZO LA AJIRA KWA VIJANA NCHINI

Kuendelea kushamiri kwa tatizo la ajira kwa vijana nchini ni kielelezo cha jinsi CCM na serikali yake walivyoshindwa kutoa uongozi thabiti kwa nchi na badala yake kuwa janga la taifa .

Taatizo la ajira nchini kwa kiasi kikubwa ni matokeo ya mfumo haramu wa elimu ambao kwa makusudi umekumbatiwa na serikali ya CCM kwa manufaa yao ya kujidhatiti madarakani.

Mfumo wa elimu uliopo na kiwango duni cha elimu kinachotolewa kinazalisha  vijana zaidi ya 800, 000 kila mwaka wasio na uwezo wa kuajiriwa popote na hata kijiajiri kwa chohote

Serikali ya CCM imekosa akili na maarifa ya kutambua kuwa elimu bora inayokidhi mahitaji ya taifa ndio njia mojawapo na muafaka kutatua tatizo la ajira nchini kwani fursa za ajira zimejaa duniani kote na wanaozifaidi ni wale wenye maarifa na ujuzi ambao msingi wake mkuu unatokana na elimu bora wanayoipata.

Kuonyesha kwamba serikali ya CCM imefilisikia fikra na maono ya kulinasua taifa kutoka kwenye janga hili, sekta ya elimu sio kipaumbele kwenye bajeti yake ya mwaka 2013/2014 na hata bajeti zilizopita. Kama taifa ni lazima kuwekeza kwenye elimu kwa ufanisi na sio kwa ubabaishaji na usanii kama huu unaofanywa na serikali ya CCM.

Sambamba na kushindwa kufanywa mapinduzi ya elimu nchini Serikali ya CCM imeendelea kuwaweka vijana wa taifa hili rehani kwa kuendelea kuuwa viwanda ambavyo kimsingi ni injini nyingine ya kutatua tatizo la ajira nchini. Viwanda ndio sekta inayoweza kuajiri watu wa aina yoyote, wenye ujuzi na wasio na ujuzi, wenye elimu na wasio na elimu, lakini Serikali ya CCM imefubaa kimawazo kulitambua hili.

Kuimarisha sekta ya viwanda maana yake ni kuinua sekta ya kilimo ambayo ni eneo muhimu la kutatua tatizo  la ajira nchini. Kwa kujenga uchumi wa viwanda maana yake utahitaji mali ghafi ambazo zinazalishwa hapa nchini.

Kujenga viwanda vya kubangua korosho maana yake unawahamasisha wananchi wa kusini walime kwa wingi korosho maana unawahakikishia soko la korosho zao. Kujenga viwanda vya kusindika matunda maana yake unawahamasisha wananchi walime kwa wingi matunda kwa kuwa unawahakikishishia soko la matinda yao. Kujenga viwanda vya nguo maana yake unawahamasisha wanachi walime kwa wingi pamba kwa kuwa unawahakikishia soko la pamba yao n.k

Taifa linahitaji uongozi mpya wenye maono mapya ili kujenga taifa bora na hili haliwezekani chini ya chama na serikali inayojifia ya CCM.

Ni fedhea kuwa na serikali ya watu waongo wenye kutoa ahadi za adaha kwa wananchi hususani vijana.

Mwaka 2010, Rais Kikwete alihaidi kujenga machinga Complex zaidi kwenye manispaa za Kinondoni na Temeke, akidai zitasaidia kutatua tatizo la ajira lakini mpaka leo hii hakuna cha hizo zinazoitwa Machinga Complex ukiacha ile pale Ilala ambayo inafuga panya na popo mle ndani. Maana yake Rais ni muongo!

Serikali imebaki kukimbazana kwa mabomu na vijana mitaani ambao wameona njia ya kujiaajiri wenyewe ni kufanya umachinga. Chini ya serikali mufilisi ya CCM, vijna wanoenakana ni nuksi mijini, wachufuzi wa miji nk. Kama serikali haitaki haya iwekeze kwenye elimu, ijenge uchumi wa viwanda, ifanye mapinduzi ya kilimo jambo ambalo ni dhahiri hata ashuke malaika serikali hii haitaweza kufanya hivyo.

Hivyo ni muhimu vijana kufanya mabadiliko ya msingi na mabadiliko haya ni kuondoa uongozi wa CCM uliopo ambao hauna wazo lolote jipya na kupata serikali ya mpya ya chama kipya chenye mawazo mapya na njia mbadala za kushughulikia matatizo ya vijana na jamii kwa ujumla nchini. Serikali hii na chama hiki ni CHADEMA.

Kufanya mabadiliko haya ni muhimu vijana popote mjitikeze kugombea na kushika nyadhifa za serikali za vitongoji, vijiji na mitaa mwakani kupitia CHADEMA na udiwani na ubunge mwaka 2015

Deogratias Munishi

Katibu Mkuu -BAVICHA